«آیتک مندن ال چک!»

آی تک    

    مندن ال چک،  

             بو اولماز کی!

سوزدورمه گؤزلریوی،

          یئرلشمه رم  گؤزلریوه.

دولوب داشارام،

         سئل قوشارام.

آخی سن؛

    دنیزلری تاپانمازسان.

بیلیرم!

آیتک

   مندن ال چک، 

بو اولماز کی!

 من داحی باشقالاشمیشام!

باشقالاشدیریلمیشام بلکی ده!

بلکی اولدوزلاردانام،

                  دؤشدیلمیشم

                            گئجه یه!

                   پارلامالییام قارانلیقدا!

باشقا چاغین آدامییام می؟!

باا...خ؛

    قورانمیرام ساعاتیمی آنلارینلا!

بیلیرسن کی حپ یاتارام!

                   گئج چاتارام!

یوخ آ..آ...

     ساقین اللشمه؛

             ساعاتیوی آنلاریملا

                              قوراسان.

واخت چاتار؛

        پاتلایارسان، بیلیرم!

آیتک

   مندن ال چک، 

           بو اولماز کی!

چؤپ کیمی بیر اوغلانام،

                بیر دری، بیر سوموک.

تارلالارین اؤلولونه بنزه ییرم.

اؤتنمه رم بوبول کیمی یاز چیچه ییم!

هممه شه قاریلتیلار ائشیتمیشم!

                قارقالاری کیش ائتمیشم.

سن گئت،

          تاپ؛

           یاراشیقلی بیریسین،

                   اوسته لیک شاعیر اولا.

ساغیرلیق توتار سنی

                        بیلیرم!

آیتک

   مندن ال چک، 

           اولماز کی آخی!

سن حپ؛

     گیلاس چیچکلری اییله میشسن.

و جیجیلنمیشسن

             گیلاس سیرغالاری له!

من حپ؛

    چام قوخوسو اییله میشم.

حه؛

 سئورم ده.

الیمی سیخسان؛

         دونارسان، بیلیرم!

آیتک

   مندن ال چک، 

           بو اولماز کی!

چیخساق

    خییاوانا ایکیمیز؛

         سن قیسقانیب،

                  قیرجاناجاقسان!

من نیسگیلله نیب،

          آغلایاجاغام.

سن اوزلره باخاجاقسان.

من؛

 اوزده کیلره.

یالقیزلیغیما دوزنمزسن،

       اؤزووو اؤلدوررسن، بیلیرم!

آیتک

   مندن ال چک، 

           بو اولماز کی!

لاخلادا بیلمه رم؛

         یوخولاریوین ننیسینی.

باخسانا...

      ایضطیراب دولویام.

ال-آیاغیم تیترر،

            دپرم اولار،

                 جالانارسان، بیلیرم!

آیتک

   مندن ال چک، 

           بو اولماز کی!

دیرناقلارینی اوزادان

               کیشیلردن دئییلم.

یئینمه ییب یالانی،

         یئییرم دیرناقلاریمی.

بیلیرمی سن؟

      چکیلن خریطه ده؛

                دیرناق اتدن بئله

                          آیری ائدیلیر!

بارماقلاریمی بیبره باسمالییام،

                                گؤستره رک.

الوولانیب،

    توستولرسن، بیلیرم!

آیتک

   مندن ال چک، 

           بو اولماز کی!

گه وزه بیری دئییلم کی!

دوندورمانین بویاسین بئله

                             اؤونمه رم!

حپ سوسوب...

            سوسوب...

                 مزار قازارام سؤزلریمه،

                                     گمیره-گمیره،

                                              دوداقلاریمی،

                                           قانایار...

                                             حئی قانایار...

                                                      بزکله نر.

به ینمزسن؛

        ماتیک دئییل کی آخی.

 آللیغیمیز حایقیری دیر.

سویونارسان، اوشویرسن، بیلیرم!

آیتک

   مندن ال چک، 

           بو اولماز کی!

بیر معادله دیر؛

          چؤزولمز.

ائحئی...

    ان قوتسال دوشونجه م؛

حپ بیر یانی آغیر باسار،

     یئلله نر بیری

          دولار هاوایا،

                 اونا دولار هاوا.

                    او بیری؛

                      اوچورومدان زویر.

اللرین توشو بااا..خ؛

              مووازی دیر!

صیفیردا گؤروشر ایلیشکیلر!

قایداسی تاپیلماز!

                 هردن بیلی اولاریق.

                                     بیلیرم!

آیتک

   مندن ال چک، 

           بو اولماز کی!

من؛

 قارشیلیقسیز اورکله ایشله رم.

سن؛

 قارشیلیقلی چؤرکله.

حئی؛

  قابارار اوره ییم.

     گؤزلریم سولوق چالار.

                     پاتلایار باخیشیم.

حئی؛

  قابارار ایسته یین.

سایمازسام؛

     دویقولارین سولوق چالار.

ساغلامازسام؛

     یامان بومبان پاتلایار.

آمما  من کی شاعیرم.

منله ایشله سن؛

 شیشلرسن گؤنلووو،

         دیشله یرسن دیلیوی،

                        آخار،

                           قانار،

                             بیلیرم!

آیتک

   مندن ال چک، 

           بو اولماز کی! 

تکجه لیییوی قوی؛

             گؤز یاشیمیدا

                      آریندیریم.

قوی؛ حپ اوزووو،

            کیرپیکلریمدن آسیم.

قوی؛ آدیوی،

       گؤره بیلدیکلریمده اوخویوم.

قوی؛ سئوگیمی،

          نبیض حیزیمدا تیکرارلاییم.

قوی؛ سئودامیزی،

          ابدی ائیله ییم

              آنیت کیمی شئعریمده.

و...

آیتک مندن ال چک، بو اولماز کی!

قوی؛ حپ رویالاریمدا،

          یاغیش سیرغالی قیزایله

                                  سئویشیم.

آیتک؛

   مندن ال چک، 

         کاش اولسایدی...

شئعر:خسرو صلح کننده «باریشان»