اینانیلماز،آمما گئرچکسن اؤلوم کیمی.

یوخ سنین دک،تکرارسیز،تکسن اؤلوم کیمی.

آنلاشیلماز، زامانسیز بیر عئشق، قاچیلماز.

کیمی سئچسن ؛ تسلیم ائده جکسن اؤلوم کیمی.

شئعر:خسرو صلح کننده(باریشان)

بیر نفر ایچیب چاخیر،

         سئکسه چاخان عادتینی

                                داغلایاراق.               

سیقارین یانماسیندا

         سؤندوره رک شهوتینی.

□□□

دومان...

  دومان...

□□□

بیر کؤرپه یاشاییشدا دیرنمه یی

گؤزلریمده ائدیردی رسم.

□□□

سونراداکی؛

باخیشلاریم

   عدالتین سرگیسینده

                   او تابلونو

                         ساتانمادی!!!

شئعیر:خسرو صلح کننده«باریشان»

30/3/1383

سئودیییم قیزا بنزه ییر شئعیرلریم؛

                                  رؤویا کیمی.

بیر شه هردیر شئعیرلریم؛

                            تبریزیم کیمی.

بیر قاطاردیر شئعیرلریم؛

دمیر یولو

     شه هرین

        قاپیسینا دک.

باغیریرلار

    اؤپوشرکن سؤزجوکلر

               میصراع ائولی ییغوالاردا.

چاغیریرلار...

       باغیریرلار...

بیر یاساق

   قارغاشا دوغولور

               سؤزجوکلرده

                          یاشاما.

بیر اودلو سئودا

      بوی آتیر سؤزجوکلرده

                             یاش، آما!

بیر ماحنی یول یاشاییر

                     سؤزجوکلرده:

                                   آشاما. 

ماوی گؤزلریندن سوزوله جه یم.

اینجی تک سینه وه دوزوله جه یم.

بیر آن تک الیندن اوزوله جه یم.

یاتسان دا یوخووا گله بیلرم.

دئمک من ده بیر گون اؤله بیلرم.

سنه یازدیغیم شئعرقالاجاق یاریم.

آ...جئیران سئوگیلیم،آ...گؤزل یاریم.

ساچلاریوی اوخشایاجاق روزگاریم.

سنینله سئودامی بؤله بیلرم.

دئمک من ده بیر گون اؤله بیلرم.

اوشاقلارین ناغیلیندا یاشارام.

چیرکلنمه میش دویغولاردا داشارام.

« دویمه قله» قوشماسینی قوشارام.

تاپماجانی گوله-گوله بیلرم.

دئمک من ده بیر گون اؤله بیلرم.

داحی تر تؤکمه رم قارین یولوندا.

یوخلوغا گئدرم وارین یولوندا.

واریمدان گئچرم یارین یولوندا.

نه دیر بو ایضطیراب، چیله، بیلرم.

دئمک من ده بیر گون اؤله بیلرم.

یوخ، قورخمام کیمسه دن چکمه رم خیمی.

برکده قوللانارام اؤلوم شانسیمی.

عجلله ائدرم اؤلوم دانسیمی.

یارانیش هدفین بیله بیلرم.

دئمک من ده بیر گون اؤله بیلرم.

قورخونون حیدودون گئچیب،گئدرم.

آییران مفتیلی سؤکوب دیده رم.

چاتمازلیق اؤلکه سین الده ائدرم.

نه دیر شو قورولان حیله، بیلرم.

دئمک من ده بیر گون اؤله بیلرم.

داحی قوللانانماز باشداکی منی.

قوللانسا قوللانار داشداکی منی.

سئوسن ده سئورسن کاشداکی منی.

حئسابدان اؤزومو سیله بیلرم.

دئمک من ده بیر گون اؤله بیلرم.

بلکی ده شئعریمده یاشایار آدیم.

نه مالیم-مولکوم وار، بونلار هر زادیم.

دردلری بیلمیرم؛حاردان آنلادیم؟!

شئعیر حاردان گلیر دیله، بیلرم.

دئمک من ده بیر گون اؤله بیلرم.

خزانسان،نه اولار گوله، بیلمزسن.

یاراسان، درد نه دیر،بیله بیلمزسن.

دای منی آغلادیب گوله بیلمزسن.

ائی دونیا من سنه گوله بیلرم.

دئمک من ده بیر گون اؤله بیلرم.

بیزی ایدیرنی،بیر گون ایه جم.

بؤیوسم خالقیملا من بؤیویه جم.

او سون نفسیمده وطن دئیه جم.

گولله لره قارشی گله بیلرم.

دئمک من ده بیر گون اؤله بیلرم.

شئعیر:خسرو صلح کننده(باریشان)