سایقیدهیر شاعیر و یازارلاریمیز لوطف ائتمیشلر منیم «اونوتدوم یئریمهییمی» شعریمه اؤز دهیرلی یوروملارینی یازمیشلار. بو یوروملارا جاواب بعضی آچیقلامالاری گرکلی دویدوب اونلاری یازیب وئبلاگا قویدوم. اینشاللاه یاخین گلهجکده منیم شعره و بوگونکو یازینیمیزا گؤره گؤروشلریمی بو وئبلاگدا اوخویا بیلرسینیز. ایندیلیکده سیزی بو آچیقلامالارلا باش-باشا بوراخیرام. یئنه ده دهیرلی یوروملارینیزی گؤزلهییرم.(یوروملارین اصلینی اونوتدوم یئریمهییمی شعرینین یوروم بؤلوموندن اوخویا بیلرسینیز.)
سایقی و سئوگیلریمله:خسرو باریشان
-----------------------------------------------------------------
سایین اولواولوس جنابلارا؛ نهدن شعر قیسا اولمالیدیر؟ منجه شعرین ایچرییی اونون اؤلچوسونو بیلدیرر. یعنی اوزون اولماسی گرهکن شعری قیسالتسان اکسیک دوروما دوشر. شعرین کلمهلرینین دیکی و یاتای ایلیشکیسی او قدر برک اولمالیدیر کی بیر کلمهسینی دهییشیب ویا گؤتورسن شعر بوتونلوکله شوملایار. منجه بو شعرین دوزهلرین نه آرتیرماق اولار ونه ده اکسیتمک اولار. چونکو شعرین ایچ و ائشیک ایلیشکیلری پوزولار.
منجه اورمو گؤل دئییل بلکه دنیزجیکدیر یعنی بالاجا دنیزدیر. گؤل حسابلاساق اونو کیچیلتمیش اولاریق. آنجاق «یوی» و«ینی» اکلرینه گلدیکده؛ «ینی» استفاده ائتسک اوچونجو و ایکینجی شخصین فرقی بیلینمز. بو قونویا دؤکتور زهتابی ده آذری دیلینین صرفی سسی کیتابیندا توخونموشدور. من ده بونو دوغرو بیلیب باکی وتورکیهنین بو قونوداکی گیرامئرینی یالنیش بیلیرم.
یئنه ده یوروم یازدیغینیز اوچون ساغوللاریمی بیلدیریرم. دوشونجهنیز آفت گؤرمهسین، دویغونوز جوشغون اولسون.
--------------------------------------------------------------
سایین «نادر ازهری» جینابلاری یازدیغینیز یوروم اوچون ساغوللاریمی بیلدیریرم. یازمیشسینیز کی؛ «آدیم بوتون تئلسیزلرده دئییلیر» سطرینده «اَحمد قایا»دان ائتکیلنمیشم. بیرینجیسی من «بوتون تئلسیزلرده آدیم قاچیردی» یازمیشام، ایکینجیسی دئدیینیز سطیر «احمد قایا»دان یوخ، بلکه شاعیر «یوسوف خیال اوغلو»نون «دوکونما یانارسین» شعرینه عاییددیر و اودا بئله یازمیشدیر:«بوتون تئلسیزلرده آدیم اوکونور». سایین اوستاد بیر شعری اینجهلهینده شعرین بوتونلویون نظره آلارلار و شعرین هربیر دوزهسین، هربیر سؤزجویون او بوتونله ایلیشکیده آراشدیریب ایردهلهیرلر. بو شعرین فضاسی «خیالاوغلو»نون شعرینین فضاسییله تام فرقلی بیر فضادیر. بونا گؤره ده شعرین یاتای و دیکی، ایچ ودیش ایلیشکیلری ده تام فرقلی بیچیمدهدیر. یعنی بو دوزهنین اورتایا چیخماسیندان قاباق اونجهکی دوزهلرین یارانیشی و بو دوزهیله ایلیشکییه گیریشمهسی گرهکیر. بیلمیرم سؤزومو یاخشی دئیهبیلدیم یوخسا یوخ، یعنی دیگرلرینین استفادهائتدییی سؤزجویو ایشلتمک دئمک دئییل کی اوندان ائتکیلنمیشیک. بلکه بوتون فضا و ایلیشکیلری ده شعرده حسابلامالیییق. یئنه دهیرلی یوروملارینیزی مندن اسیرگهمهیین.
----------------------------------------------------------
خانیم«رقیه کبیری» یوروم یازدیغینیز اوچون سیزدن تشککور ائدیرم. یازمیشسینیز کی؛ «آتیلا ائلخان»ین ائمپیرییال اوتئلی شعرینین حیسسینی بو شعردن آلمیشسینیز. اؤنجهلیکله بونو دئمهلییم کی شعر؛ ائتکیلنمکدن یارانار و ائتکیلنمهین کیمسه ده شاعیر اولابیلمز. شاعیر یاشادیغی چئورهدن، دورومدان، گؤردویوندن، ائشیتدییندن، اوخودوغوندان ائتکیلهنیب شعر دویغو و دوشونجهنین هیبریدیندن جوشوب شاعیرین ضمیریندن سوزر. آنجاق بو ائتکیلنمک حیدودو تقلیده دؤنوشمهمهیه قدردیر. شاعیر تقلید ائدینجه آرتیق شاعیر دئییلدیر. منجه بو شعردن هر حانسی حیسسی آلماقدا آزادسینیز، او سیزه قالیب و منیم و هئچ کیمسهنین قاریشماماسی گرهکیر. آنجاق «ائمپرییال اوتئلی»له «اونوتدوم یئریمهییمی» شعرینین فضا و قورولوشو فرقلیدیر. آتیلا ائلخان بئله باشلاییر:«من هیچ بؤیلهسینی گؤرمهمیشدیم/ ووردون ایچیمه گیردین/ اعتراضیم وار.» شعرین سیتونون بو باشلانقیج اولوشدور بیر حالداکی من شعری باشقا تمل اوستونده یازمیشام. ساغولون. دهیرلی یوروملارینیزی مندن اسیرگهمهیین.
------------------------------------------------------------------
سایین توتقون جینابلاری نهدن شعر قیسا اولمالیدیر؟ منجه شعرین ایچرییی اونون اؤلچوسونو بیلدیرر. یعنی اوزون اولماسی گرهکن شعری قیسالتسان اکسیک دوروما دوشر. شعرین کلمهلرینین دیکی و یاتای ایلیشکیسی او قدر برک اولمالیدیر کی بیر کلمهسینی دهییشیب ویا گؤتورسن شعر بوتونلوکله شوملایار. منجه بو شعرین دوزهلرین نه آرتیرماق اولار ونه ده اکسیتمک اولار. چونکو شعرین ایچ و ائشیک ایلیشکیلری پوزولار. یئنه ده یوروم یازدینیز اوچون ساغوللاریمی بیلدیریرم دوشونجهنیز آفت گؤرمهسین، دویغونوز جوشغون اولسون.
------------------------------------------------------------------
سایین «فرزاد لیسی» افندی اونجه لیکله یازدیغینیز یوروم اوچون ساغوللاریمی بیلدیریرم. آنجاق یازدیغنیز یورومدا بیرآز یازدیغینیزین جزءلرینی دیققتله آچیقلاسانیز سئوینرم. یازمیشسینیز:« شئعیریی اوخودوقدا بیر چوخ شاعیری گؤرمه ک اولور شئعیرینده» حانسی شاعیرلری گؤرمک اولار لوطفن دلیل و قانیتلا آد آپارین. ائله دلیلسیز، برهوایی سؤز یازماقلا علمی نقد اولا بیلمز. بئلنچی تنقید ائتمک نه یازیق بیزلرده مودد حالینا گلمیش، بیزلر شاعیرین شعرینه توخونماق ورینه شاعیرین اؤزونه توخونوروق یادا علمسیز، قانیتسیز بیر بیچیمده شعر و شاعیری خورد ائتمهیه چالیشیریق. بو سؤزومون اثباتینی شعر وئبلاگلارینا، نقد وئبلاگلارینا باش وورسانیز گؤره بیلرسینیز. بئله گئتسه ((وای بئله ادبیاتین حالینا)) دئمهلیییک. یئنه ده یوروم یازدیغینیز اوچون ساغوللاریمی بیلدیریرم. دوشونجهنیز آفت گؤرمهسین، دویغونوز جوشغون اولسون.
salamlar və sayqilarimla
ədəbi veblərdə özəlliklə şeir odalarinda tartişmalar dadli olabilər yaşa sevgili xosruv bəy
سالام و سایقی لار، یاشامالیسان قارداش.
عزیز خسرو افندی
گلدیم ده اوخودوم او یورومو من یازمیشام یوخسا سن یا باشقاسی بیله مه دیم داها دوغروسو یادیما گلمیر . بلکه ده آلزایمئره توتولموش بو طیفیل آنلاماییر . هر حالدا شئعیرینی اوخوماغا چاغیرسایدین اوخودوم اوست - اوسته اوغورلو شئعیردی بیر آز آرتیق واخت قویسایدین داها دا گؤزل اولاردی سانیرام .
"اونوتدوم یئریمهییمی" دیزه لرینین تومونون یئرینه "اونوتدوم یئریمهیی" یازمالییدین نه ده نینه گلدیکده "اونوتدوم" سؤزجویونده من وار "یئریمه ییمی" سؤزجویونده کی من آرتیق دیر . سانکی دئییرسن ("من سو ایچیرم ". کی راحات جا دئیه بیلردین "سو ایچیرم" حشو اولان من سیلینسین ) یا "آیاقلاریم دالیمجا سورونوردولر!" = "آیاقلاریم دالیمجا سورونوردو!" یازمالییدین . بورادادا سانکی دئییر سن ("سایین یازیچیلار گَلدیرلر" کی راحات جا دئیه بیلردین "سایین یازیچیلار گلدی") ایکینجی جمع باغلاما حشوی سیلینسین .
و و ...
عزیز اولو اولوس دوستوموزون ایشاره ائتدیکلرینین سونویلا راضیییم . - ( " ائس- مئس لریوی" سؤزونون سونونو "لرینی" یازساز ادبی اولار. ائله جه ده"یوللادیقلاریوی"یوللادیقلارینی ،"آغزیوی" آغزینی و "ایزلریوی" ایزلرینی اولمالیدیلار. "دارقاشاییرد" دا دارغا شاییرد اولمالیدی . " یورقانیم" یورغانیم اولمالیدی. "جهندم" ده جهنم اولمالی. )
بیرده یازمیش سان :
- (شعرین کلمه¬لرینین دیکی و یاتای ایلیشکیسی او قدر برک اولمالیدیر کی بیر کلمه¬سینی ده¬ییشیب ویا گؤتورسن شعر بوتونلوکله شوملایار. منجه بو شعرین دوزه¬لرین نه آرتیرماق اولار ونه ده اکسیتمک اولار. چونکو شعرین ایچ و ائشیک ایلیشکیلری پوزولار. )
بو دئدیینیز مدئرن و ساختارلی شئعیرین اوسلوبلاریندان شئعیر بیر نقطه دن باشلاییب بیر آیری نقطه ده سونوجلانار . من سیزین بو شئعیرده اُ ساختاری گؤرمورم .سیزین بو شئعیردن بیر کلمه هئچ بیر بند ده گؤتورولسه شئعیرینیزین حالینا هئچ نه اولماز . (اولسا - اولسا بو شئعیره اولماز) . تمثیل چون شئعیری ایکینجی بنددن باشلا یا یوخ اوچونجو یا دؤردونجو دن قاییت بیرینجی یه اوخو قالانین یا بیر بندین اوخوما شئعیرین حالینا هئچ نه اولماز . دئمه یه چالیشدیغیم بو کی بو بندلر هه ره سی بیر فضا یارالدیب ایستر اوغورلو ایستر اوغورسوز . بو داغینیق فضالاری هر کس اؤزو اؤز ایسته دییی کیمی دوزنله یه بیلر .
تام منیم بیر چوخ شئعیریم کیمی
ساغ قال قاداسی
سلام . گنجینه موسیقی تبریز با موسیقی های جدید بروز است . حتما مراجعه نمایید . لطفا این وبلاگ را به دوستان و اشنایان خود نیز معرفی نمایید .