گیزلیجه آغلاییش...

 

اوْ گئجه من ده آغلادیم؛

                        گیزلیجه.

ائی آنا؛

    سانما کی داشدیر اۆره ییم،

                       اوْ گئجه من ده آغلادیم.

بیر ایشیق شیریلدادی گؤزلریمین دامجیسینا.

بیر حۆزون کؤچدو منیم شنلیییمه.

چؤکدو اۆزه باخیشلاریم.

آنلادیم اوْندا بوْشون بوْشلوغونو.

اۇلدوز-اۇلدوز ایشیلدادیم؛

                          زامانه نین،

                              قاراگؤی صایفاسینا.

اوْ گئجه من ده آغلادیم،

اؤزوم ییغیشدیم اؤزومه؛

                      اوْلدوم آنا.

باغیشلا بۇ کز منی؛

              همیشه تک؛

                  روْلۇوۇ یانسیلادیم تأتریندا یاشاییشین،

                                                    دوْغدوم اۇشاق،

                                                      دوْغومون سانجیسینی حیسس ائله دیم.

وکؤرپه می؛

سئوگیمین داماریندان اَمیشدیریب،       

دۆشونجه مین حؤروکلرینده بله ییب،

نفسلرین نننیسینده،

           آهیمین لای-لاسیندا؛

                              «لای-لای دئدیم کی؛  یاتسین،

                                       قیزیل گۆللره باتسین.»

تۇمارلادیم ساچلارینی.

باخیشین دوْداق ایله اؤپدوم اۆزون.

و سرگیسینده جانیمین؛

       گؤستریب یاشاییشین فلسفه سین

                                               گؤزلرینه.

آغلایاندا؛

    دۇیغولار باغرینا باسدیم بیله سین.

خسته له ننده؛

    گؤزلریم یۇمولمادی.

اۆره یی ائدیب سیپر؛ سانجیلارا،

                      بالاجا باشماغینا؛

                         تیکدیریب یوْل یوْرودان گؤزلریمی،

                                  بالاجا آیاقلارا بیر اؤپوجوک،

و آغلادیم،

   اوْنو «بیر» ده حپ بؤیوتدوم.

اوْ گئجه من ده آغلادیم،

             چیچکله ننده آرزیلار،

                           سوْلدو گۆلوم.

اَح-اَح، اَحه-اَحه...

بسدیر اۇتان،

      کس سسیوی.

آنا اوْلماق اۆرک ایستر.

آنا اوْلماق جییَر ایستر.

آنا اوْلماق دؤزۆم ایستر.

آنا اوْلماق سئوگی ایستر.

وار می بۇنا جسارتین؟!

      یوْخ...یوْخ... اوْلانمازسان.

همین ائله؛ سن اؤزۆوه،

   اوْ قۇرو اَرککلییین سیمیشقاسین چیتلایاراق؛

                                             شیشیرت قارین.

اوْ گئجه من ده آغلادیم،

اۆره ییمده مرسییه؛

    اوْخودو نوْوحه منه دۇیغولاریم.

اۆره ییم چیرپدی اؤزۆن،

            قفسین میله سینه.

اؤز ایچیمده آغلادیم.

سنه بیر سؤز دئمه دیم،

                       دئینمه دیم!!!

چۆنکی سن...

   چۆنکی سن بیر آناسان،

       دؤزنمزسن آخ، بالاوین گؤز یاشینا.

اوْ گئجه من ده آغلادیم،

                         گیزلیجه.

شئعیر: خوْسروْو باریشان

قایناق:یاغیش ثانییه سی کیتابی