کیتاب ائندیر...Kitab endir

“Xosrov Barışan”ın “İçdim Təbrizin ışıqlarını” kitabı yayınlandı. Bu kitabı endirmək üçün buraya tıxlayın. 

دیکله مه ی شعر کؤنده لن...Köndələn şeirinin oxunuşu

نام شعر: کؤنده ­لن

شاعر: خسرو باریشان

دکلمه کننده: خسرو باریشان

شما می توانید این دکلمه را با کلیک براینجا دانلود نمایید.

Şeirin adı: Köndələn

Şair: Xosrov Barışan

Şeiri oxuyan: Xosrov Barışan

Siz bu şeir oxunuşunu buraya tıqlamaqla endirə bilərsiniz.

اورمونون حوزون بَدیزی(1)....URMUNUN HÜZÜN BƏDİZİ

  ائله بیل بیر حوزون بَدیزییدی..!

  گل-گئت­ لرین اورتاسیندا 

    اؤز یالقیزلیغینی قوجاقلامیش 

                         بیر دیشی کدر، 

                             یاغیش سیرغالی گؤزل. 

  چاتیلماز یوکلو آرزی بولودلاری 

                       باشیندا اوچوردو، 

  و گئرچه یین قوورا هایلی قوشلاری 

                          هئیکلینه سیچیردی! 

  بو قارانلیق-قان چؤککه ­لرله 

    گؤزلرینده یاش دامجیلارینی سایانمازدیم! 

  توخونسایدیم؛ بوغولاردیم، بیلیرم. 

  بئله بیر یوخو-قالاقدایسا 

    گولوشونو ایسته دیم، واا...ای 

       آللاه بلامی وئرسین، گولدو... 

  سؤکولدو بنیزی؛ 

    بیر پارادوکس دنیزی... 

  ائله بیر اؤپدوم کی... 

   ییخیلدی اینتئرنئتده کیچیک دونیا کندی!!! 

  ائله­ بیل اؤز ایچینی قاپادان بیر قاپییدی! 

  بوتون سئوگیلره باکیره بیر دیشی. 

  سئویشمه­ میز اوزاقلیقییدی...! 

  زامان بیر قبیر قازان 

    یاشادیقجا اؤزونو قویلاییردی! 

  ائله­ بیل کشف­ اِئدیلمه­ میش بیر آدایدی، 

  یا دا کی بوتون نقشه ­لردن آدینی سیلمیشدی!!! 

  آرامیزداکی کؤرپو 

              قوروتموشدو 

                 هر ایکیمیزی ده! 

  اینتئرپول بئله تاپانمازدی 

          گیزلی-آیدین سئودامیزی. 

  یورقوندوم شپه­ سیزلیکدن 

     اوتوروب گؤزلرینین قهوه ­سینی ایچدیم. 

  ائله­ بیل لوله­ سی توتوق بیر توفنگییدی، 

  اَرکک الینده توتساق... 

  قَهَر گوللَه کیمی 

    بوغازینی بیچمکده..، 

  و هر آن 

     اؤز گؤزیاشینی ایچمکده... 

  «بوراخیب گئتمه، نولار... 

                  سئویرم سنی 

                     ائی یار» دئدیم؛ 

  آغلادی... 

    آغلادی... 

       آغلادی...

ائله­ بیل هرگون 

    یازیلیب اوخونمایان کیتابییدی! 

  آچیلیب واراقلاندی اؤنومده گئچمیشی؛ 

  دئشدی اوره ­ییمی 

    گول-یارا سؤزجوکلری..، 

  آغلادیم... 

    آغلادیم... 

      آغلادیم...

  ⎕⎕⎕ 

  سسین معصومیت موزه ­سی، 

    آچاری ایتمیش بیر قاپیدیر سؤزلرین. 

  آغلاما آی قیز... 

  اَوَدیر دَده ­نین یالنیشلاری. 

  من تبریزین قاراگیله ­سی؛ 

         بیر جادّه وار کی اوندا 

                          قورخورام 

                            اؤلومون توووندان..! 

  سن اورمونون آلاگیله ­سی؛ 

                             ترپَن... 

                               سیلکه ­لن... 

                                    دالقالان... 

                                       بوتون قیفیللاری آچ. 

  بو شئعیر بیر ماهنی 

      بو ماهنی بیر آچار 

                      ناچارلیغیوا...

---------------------------------------------------------- 

1. بَدیز: مجسّمه

شعر: خسرو صلح کننده(باریشان)

1392/3/15

Eləbil bir hüzün bədiziydi..!

Gəl-getlərin ortasında

  Öz yalqızlığını qucaqlamış

                         Bir dişi kədər

                          Yağış sırğalı gözəl

Çatılmaz yüklü arzı buludları

                         Başında uçurdu

Və gerçəyin qovra haylı quşları

Heykəlinə sıçırdı!

Bu qaranlıq-qan çökkələrlə

Gözlərində yaş damcılarını sayanmazdım!

Toxunsaydım; boğulardım, bilirəm.

Belə bir yuxu-qalaqdaysa

  Gülüşünü istədim, vaa...ay

Allah bəlamı versin, güldü...

Söküldü bənizi

Bir paradoks dənizi...

Elə bir öpdüm ki...

Yıxıldı internetdə kiçik dünya kəndi!!!

Eləbil öz içini qapadan bir qapıydı!

Bütün sevgilərə bakirə bir dişi.

Sevişməmiz uzaqlıqiydi, seksimiz ıraqlıq..!

Zaman bir qəbir qazan

Yaşadıqca özünü quylayırdı!

Eləbil kəşf edilməmiş bir adaydı,
Ya da ki bütün nəxşələrdən adını silmişdi!!!

Aramızdaki körpü

            Qurutmuşdu

Hər ikimizi də!

İnterpol belə tapanmazdı

Gizli-aydın sevdamızı!

Yorqundum şəpəsizlikdən

Oturub gözlərinin qəhvəsini içdim.

Eləbil lüləsi tutuq bir tüfəngiydi,
Ərkək əlində tutsaq...

Qəhər güllə kimi

Boğazını biçməkdə..,

Və hər an

Öz gözyaşını içməkdə...

Buraxıb getmə, nolar...

"Sevirəm səni

Ey yar dedim;

Ağladı...

Ağladı...

Ağladı...

Eləbil hərgün

  Yazılıb oxunmayan kitabıydı!

Açılıb varaqlandı önümdə geçmişi;

Deşdi ürəyimi

  Gül-yara sözcükləri..,

Ağladım...

  Ağladım...

    Ağladım...

⎕⎕⎕

Səsin məsumiyət müzəsi,

Açarı itmiş bir qapıdır sözlərin.

Ağlama ay qız...

Əvədir dədənin yalnışları.

Mən Təbrizin qaragiləsi;

       Bir caddə var ki onda

                           Qorxuram

Ölümün tovundan..!

Sən Urmunun alagiləsi;

Tərpən...

Silkələn...

Dalqalan...

Bütün qıfılları aç.

Bu şeir bir mahnı

  Bu mahnı bir açar

               Naçarlığıva...

------------------------------------------------------------------------------

1.Bədiz: heykəl                               
 

Şeir:Xosrov Barışan

1392/3/15