شووَرَن،آی شووَرَن...

«شوورن،آی شوورن.لیوانی اللی تومن...».

بویلاناراق ویترینده کی ساعاتلارا باخدی. ساعات اون-ایکینی، اون دقیقه سوووشوردو، و او حله دولچاداکیندان بیر لیوان ساتا بیلمیشدی. الینده یسه یالنیز اللی تومن وارییدی. بالاجا آیاقلارلا قالدیریمین دیککین چیخدی. نه دنسه بو گون دورمادان «قارا گیله» ماحنیسی قولاغیندا سسله نیردی:«تبریزین کوچه لری دولان به دولان، قاراگیله. دولان به دولان...». بو ماحنی همیشه آناسییلا آتاسینین بیر-بیرایله اولدوغونو خاطیرلادیردی.سانکی سیررلی، حسرت دولو بیر خوشبختلیک اونون هر بیر اوخونوشوندا یاشاییردی. دؤرد یاشیندایکن؛ آناسی، آتاسی ایله بیرگه ایلمک دزگاهی باشیندا بو ماحنینی اوخویاردیلار، او ایسه آناسینین چییینلرینه دیرماشاراق اونو اؤپردی.بلی... دوم-دوز؛ بئش ایل او گونلردن سوووشوردو. عذاب-ی الیم ایللرینه دؤنوشن بئش ایل، نه لر باشدان گئچیرمیشدی، نه لر..، آتاسی چاراسیزلیقدان هئرویینه بولاشمیشدی.ائی-وای..، آناسینین آغلامالاری، آتاسینین بؤوروب، باغیرمالاری بیر اعدام ناقوسو دک وارلیغین سارسیدیردی.

ایراده سیز سسله مه یه باشلادی:«شوورن، آی شوورن...».قاباغیندان قارا چارشابلی بیر قادین گئچدی.آمانسیز او گئجه یادینا گلیردی.آمانسیز، قورخمالی، او گئجه...آتاسی یئنه ده یوبانمیشدی آنجاق بو سفر سحر اولدویسا دا اوندان بیر خبر یوخویدو. اوندان بری آناسی قوحوم-قونشویا آتاسینین اونلاری ترک ائتدییندن سؤز آچیب آغلاماغا باشلاییردی.

بیردن یوخودان داشلانان کیمی ایندیکی گئرچکله اوزلشدی.اَلینده کی دولچانی لبه لنمه سین دئیه؛ برک توتدو. گونشین ایستیسی شووَرَنین ایچینده کی بوزلاری گئت به گئت اریدیردی. دوشونجه سینده بئله بیر سؤال یاراندی: اولمایا گونش ده بیز جاماعاتلا دوشمندیر؟، حامییا ایشیق ساچارکن منیم چؤرک آغاجیمی اودلاییر!!! سونرا باشین قووزادی. یوز متیر ایلریده «شمس-ی تبریز» پاساژی وارییدی.اورا ساری ایلرله مه یه قرار وئردی. حه... پاساژِین ایچینده گونشین آلوووندان قورونا بیلردی اولا بیلسین ده تونکانچیلار بوزلو شوورن آلسینلار. «شوورن، آی شوورن...»سسله یه-سسله یه آددیملاییردی، یئنه ده گؤزو ویترینده کی اوشاق پالتارلارینا ساتاشدی. اؤزوندن کیچیک باجیلاری یادینا دوشدو؛ سانکی بیر آلمانین ایکی یاریسی، بالاجا، سئومه لی ایکی ایکیز باجیسی.اونلار حله دؤرد یاشلاریندایدیلار.الینده کی پولا، دولچایا اینادلا باخیب، اؤزونه دئدی:«بوگون گرک، هاردان اولسا، بو شوورن شربتینی ساتام.بئله لیکله ائوه قاییداندا اونلارا پوفک آلا بیلرم. حه... آللاه سنه توکّل...» سونرا یسا یولا دوشدو.

گونشین ایستیسی لاب آزقالا بئیینین ده اریده جکدی کی اؤزون پاساژا سالدی. بیر نئچه آددیم ایلرله ییب پیلله لردن ائنمه یه باشلادی. بوراسی دئیه سن جنّت ایدی. جور به جور کولرلر، سرینله دنلر ایشله یرک ائله بیل بایرام آیین اورایا کؤچدورموشدولر.آل-الوان چیچکلر، بویاقلی آغاجلار دا یاز طبیعتینی جانلاندیریردیلار. تئزجه نه  سسله مه یه باشلادی:«شوورن، آی شوورن...لیوانی اَللی تومن، گل ایچ بالا، سرینله، تئز اول، دایانما، سیزه شوورن گتیرمیشم.»

گؤزلرینده سانکی بیر چیراق یاندیریلمیشدی.اورَکدن جوشماغا باشلادی.آخی گنج بیر توکانچی اونا یاخینلاشیردی. ژئللی ساچ، باهالی پالتاریندان پوللو-پارالی بیریسی اولدغو بلله نیردی. اوغلان یاخینلاشیب سؤزه باشلادی:«آی گده نه های سالمیشسان؟ اؤزون ده ائله شوورنه بنزه ییرسن کی...»

نه دن اوغلانین بئله دئدییین دوشونورکن بیر آندا دولچاسینه مؤحکم بیرشئیین دَیدییینی حیسس ائله دی. شربت پاساژین کفینده چالاسره دوغرو آخیردی، توکانچی دولچاسین تپیکله جالامیشدی.ایندی اونون «شوورن، آی شوورن...» سسینین یئرینه پاساژی قحقحه سسی بوروموشدو.کیرپیک چالمادان بیر اللرینه باخدی، بیر اَللی تومنه، بیر ده یئرده کی دولچایا. دولچا بیله سین یامانلاییردی.دولچانی اَییله رک گؤتوروب، اؤز ایچینه آجیسینی جالاداراق آستا- آستا یولا دوشدو.

------------------------------------------------------------

یازان: خسرو صلح کننده سردرود(باریشان)