رئژه...REJƏ

  سربازلار رئژه گئچیرلر. 

  ساللاقخانایا گئدن 

                    قویون سوروسو  

                            یادیما دوشور!!!  

------------------------------------------------ 

شئعیر:خسرو صلح کننده«باریشان» 

-------------------------------------------------------------------  

Əsgərlər rejə geçirlər

Sallaqxanaya gedən

                  Qoyun sürüsü

                        Yadıma düşür!!! 

-----------------------------------------------------------------  

Şeirlər:Xosrov solh konəndə(Barışan)

یاساق میوه... YASAQ MEYVƏ

  قیپ-قیرمیزی بیر آلمادیر می گؤزلرین؟! 

                                         یاساق بیر میوه! 

  و سن؛ 

       یام-یاشیل بیر آغاجسان می 

                               عؤمرومون یاییندا 

                                      دیم-دیک دوران؟! 

  و من؛ 

    بیر دوشونر می یم 

        کؤلگه لیکلر سئون بیر آیدین 

  اوتورب دوشونمک اوچون  

                      ساکیت بیر مکان 

  و شوبهه ایبلیسی هر آن 

                               هر آن... 

                                   قاش-گؤز ائتمکده! 

  آیریجا خیالین؛ 

     آلمانین دوشمه سیدیر می 

                        دیکی بیر دوشوش                    

                                         آنسیزین تپه مه 

                                             بئینیمی یئریندن لاخلادان!؟ 

  و شو دوشونر 

        دونیانین دؤنمه سینی 

                         بیلیر، بیلمه سینه ده 

                                              (همیشه 

                                                   باشی دؤندویوندن می!؟)

آنجاق 

    تانرینین محکمه سینده 

                باغیراراق سوروشور: 

                                      ((نه دن، 

                                              نییه؛ 

                                                دونیانین بئیلجه سینه 

                                                       دؤنمه سی گره کیر؟!))

  ⎕⎕⎕

بو محکمه نین حؤکمو بئیله؛

((نئیله ییم

      آنامدان دوغولمالییام، 

  اوسته لیک من 

    زامان آدلی آغاجین 

        شهوتینین میوه سییم!!!))

⎕⎕⎕

گؤره سن دوغولاندا                   

                      آغلاماغیم 

                             بیر عیصیانییدی می؟!! 

------------------------------------------------------------------    

شئعیر:خسرو صلح کننده«باریشان» 

Qıp-qırmızı bir almadır mı gözlərin?!

                                          Yasaq bir meyvə!

Və sən;

     Yam-yaşıl bir ağacsan mı

                         Ömrümün yayında

                                     Dim-dik duran?!

və mən;

  Bir düşünər miyəm

      Kölgəliklər sevən bir aydın

Oturb düşünmək üçün

                    Sakit bir məkan

Və şübhə iblisi hər an

                             Hər an...

                                 Qaş-göz etməkdə!

Ayrıca xəyalın;

  Almanın düşməsidir mi

                            Dikəy bir düşüş                     

                                    Ansızın təpəmə

                                          Beynimi yerindən laxladan!?

Və şu düşünər

      Dünyanın dönməsini

                bilir, bilməsinə də

                    (Həmişə

                         Başı döndüyündən mi!?)

Ancaq

  Tanrının məhkəməsində

              Bağıraraq soruşur:

                                   ((Nədən,

                                     Niyə;

                                      Dünyanın beyləcəsinə

                                               Dönməsi gərəkir?!))  

⎕⎕⎕ 

Bu məhkəmənin hökmü beylə

((Neyləyim

   Anamdan doğulmalıyam,

                             Üstəlik mən

                                Zaman adlı ağacın

                                  Şəhvətinin meyvəsiyəm!!!))

⎕⎕⎕

Görəsən doğulanda                 

                   Ağlamağım

                        Bir isyanıydı mı?!!

-------------------------------------------------------------- 

 Şeir:Xosrov solh konəndə(Barışan)

شووَرَن،آی شووَرَن...

«شوورن،آی شوورن.لیوانی اللی تومن...».

بویلاناراق ویترینده کی ساعاتلارا باخدی. ساعات اون-ایکینی، اون دقیقه سوووشوردو، و او حله دولچاداکیندان بیر لیوان ساتا بیلمیشدی. الینده یسه یالنیز اللی تومن وارییدی. بالاجا آیاقلارلا قالدیریمین دیککین چیخدی. نه دنسه بو گون دورمادان «قارا گیله» ماحنیسی قولاغیندا سسله نیردی:«تبریزین کوچه لری دولان به دولان، قاراگیله. دولان به دولان...». بو ماحنی همیشه آناسییلا آتاسینین بیر-بیرایله اولدوغونو خاطیرلادیردی.سانکی سیررلی، حسرت دولو بیر خوشبختلیک اونون هر بیر اوخونوشوندا یاشاییردی. دؤرد یاشیندایکن؛ آناسی، آتاسی ایله بیرگه ایلمک دزگاهی باشیندا بو ماحنینی اوخویاردیلار، او ایسه آناسینین چییینلرینه دیرماشاراق اونو اؤپردی.بلی... دوم-دوز؛ بئش ایل او گونلردن سوووشوردو. عذاب-ی الیم ایللرینه دؤنوشن بئش ایل، نه لر باشدان گئچیرمیشدی، نه لر..، آتاسی چاراسیزلیقدان هئرویینه بولاشمیشدی.ائی-وای..، آناسینین آغلامالاری، آتاسینین بؤوروب، باغیرمالاری بیر اعدام ناقوسو دک وارلیغین سارسیدیردی.

ایراده سیز سسله مه یه باشلادی:«شوورن، آی شوورن...».قاباغیندان قارا چارشابلی بیر قادین گئچدی.آمانسیز او گئجه یادینا گلیردی.آمانسیز، قورخمالی، او گئجه...آتاسی یئنه ده یوبانمیشدی آنجاق بو سفر سحر اولدویسا دا اوندان بیر خبر یوخویدو. اوندان بری آناسی قوحوم-قونشویا آتاسینین اونلاری ترک ائتدییندن سؤز آچیب آغلاماغا باشلاییردی.

بیردن یوخودان داشلانان کیمی ایندیکی گئرچکله اوزلشدی.اَلینده کی دولچانی لبه لنمه سین دئیه؛ برک توتدو. گونشین ایستیسی شووَرَنین ایچینده کی بوزلاری گئت به گئت اریدیردی. دوشونجه سینده بئله بیر سؤال یاراندی: اولمایا گونش ده بیز جاماعاتلا دوشمندیر؟، حامییا ایشیق ساچارکن منیم چؤرک آغاجیمی اودلاییر!!! سونرا باشین قووزادی. یوز متیر ایلریده «شمس-ی تبریز» پاساژی وارییدی.اورا ساری ایلرله مه یه قرار وئردی. حه... پاساژِین ایچینده گونشین آلوووندان قورونا بیلردی اولا بیلسین ده تونکانچیلار بوزلو شوورن آلسینلار. «شوورن، آی شوورن...»سسله یه-سسله یه آددیملاییردی، یئنه ده گؤزو ویترینده کی اوشاق پالتارلارینا ساتاشدی. اؤزوندن کیچیک باجیلاری یادینا دوشدو؛ سانکی بیر آلمانین ایکی یاریسی، بالاجا، سئومه لی ایکی ایکیز باجیسی.اونلار حله دؤرد یاشلاریندایدیلار.الینده کی پولا، دولچایا اینادلا باخیب، اؤزونه دئدی:«بوگون گرک، هاردان اولسا، بو شوورن شربتینی ساتام.بئله لیکله ائوه قاییداندا اونلارا پوفک آلا بیلرم. حه... آللاه سنه توکّل...» سونرا یسا یولا دوشدو.

گونشین ایستیسی لاب آزقالا بئیینین ده اریده جکدی کی اؤزون پاساژا سالدی. بیر نئچه آددیم ایلرله ییب پیلله لردن ائنمه یه باشلادی. بوراسی دئیه سن جنّت ایدی. جور به جور کولرلر، سرینله دنلر ایشله یرک ائله بیل بایرام آیین اورایا کؤچدورموشدولر.آل-الوان چیچکلر، بویاقلی آغاجلار دا یاز طبیعتینی جانلاندیریردیلار. تئزجه نه  سسله مه یه باشلادی:«شوورن، آی شوورن...لیوانی اَللی تومن، گل ایچ بالا، سرینله، تئز اول، دایانما، سیزه شوورن گتیرمیشم.»

گؤزلرینده سانکی بیر چیراق یاندیریلمیشدی.اورَکدن جوشماغا باشلادی.آخی گنج بیر توکانچی اونا یاخینلاشیردی. ژئللی ساچ، باهالی پالتاریندان پوللو-پارالی بیریسی اولدغو بلله نیردی. اوغلان یاخینلاشیب سؤزه باشلادی:«آی گده نه های سالمیشسان؟ اؤزون ده ائله شوورنه بنزه ییرسن کی...»

نه دن اوغلانین بئله دئدییین دوشونورکن بیر آندا دولچاسینه مؤحکم بیرشئیین دَیدییینی حیسس ائله دی. شربت پاساژین کفینده چالاسره دوغرو آخیردی، توکانچی دولچاسین تپیکله جالامیشدی.ایندی اونون «شوورن، آی شوورن...» سسینین یئرینه پاساژی قحقحه سسی بوروموشدو.کیرپیک چالمادان بیر اللرینه باخدی، بیر اَللی تومنه، بیر ده یئرده کی دولچایا. دولچا بیله سین یامانلاییردی.دولچانی اَییله رک گؤتوروب، اؤز ایچینه آجیسینی جالاداراق آستا- آستا یولا دوشدو.

------------------------------------------------------------

یازان: خسرو صلح کننده سردرود(باریشان)

یارادان بایاتیسی...

شئعیردیر منی یارادان.

یاراندیم من ده یارادان!

قورخوسوز، اؤزگور دوغولوم؛

سئچمه دیم آغی قارادان. 

شئعیردیر منی یارادان.

یاراندیم من ده یارادان!

شئعیرلریم بیر بارادیر؛

یارانمیشام وای، بارادان!!! 

شئعیردیر منی یارادان.

یاراندیم من ده یارادان!

اؤلسم ده هئچ یوخ اولمادیم؛

ده ییشدیردی منی زامان. 

شئعیر:خسرو صلح کننده(باریشان)

چاخیرلار دؤیوشو

باخ ...

ائی اینسان باخ...

دۆنیایا یالنیز

    سیلاحلارین

         آرپاجیق دلییییندن

                                  باخ!  

⎕⎕⎕

چاخیرلار دؤیوشه جک بیرگون!

چاخیرلار

   دؤیوشه جک

        اؤنجه میزلرده؛

یئر یۇوارلاغینین

             خریطه سی

                   چکیلن دک!

چاخیرلار دؤیوشه جک داماقلاردا؛

نفت قوْخان

     ایشچی اللری دک!

چاخیرلار بۆتون حیرصله

                     دؤیوشه جک؛

اوْرتا دوْغودا

            یارانان

              بۆتون ساواشلار دک!

بیردن بیره سوْنرا

   قۇسولاجاق بۆتون یاغیشلارا؛

ایضطیراب

     دؤیوندورن

         اۆرکلر دک!

و شئعر؛

  دردیمین اؤسگورمه سیدیر یاوریم.

⎕⎕⎕

چاخیرلار دؤیوشه جک هرگۆن،

قۇماربازلاردان خبرسیز

       گۆلله(گلوله) لرین اؤپوشمه سی دک!

نه پۇللااا...ار  سوْورولاجاق اوْنلارین ساغلیغینا

«یاشا اینسان » ماحنیسی اوْخوناراق.

سوْنرا؛

  اینسانلیق یالنیز

       ایشله نه جک رئکلامدا! 

--------------------------------

شئعر:خسرو صلح کننده(باریشان)

«بیلینمه ین»

نئجه اوْلدوسا دا بیردن؛

       جینسییتیمی اۇنوتدوم!

یئنه بیر دیشی می اوْلماقدایام؟ نه یم؟!

یوْوْ... من ارکه یم،

       بۇرما بیییغلی بیر به یم.

یئنه اللشمه،

         تیتره مه،

               قیوریلما،

                    سانجی.

دۆشونجه لریم چیغیریر،
               دۇیغولاریم چاغیریر.

سۇچ منده دیر

         دئییر پوْلیس:

               «قارشیلاشدیغیملا دۇرمادان

                                     سئویشمیشم،

                                               سئویشیرم،

                                                      سئویشرم!»

منه یاساقلار یاساقدیر.

یوْخسا من؛

      حشری بیر

            فاحیشه یم،

                      نه یم؟!

یوْوْ...

 من شوْر گؤژ

    بۇرما بیییغلی بیر به یم.

هئچ بیر سوْنوْگیرافی

              بللی ائتمه دی؛

                      کؤرپه مین ده

                             جینسییتینی.

بللی دیر

   اوْدا چکمیش آناسینا

نه دئییرم؟

من بیر آنایام می!؟

                  نه یم؟

یوْوْ...

 من ائو بؤیویو

    بۇرما بیییغلی بیر به یم.

آخ...

 وای...

   ائی-وای...

     چابالاییر سؤزجوکلر دیلیمده،

        نفس چکیر بیر شئعیر اؤنومده!!!

خوْش گلدین کؤرپه م؛

    «دادلی-دۇزلو منیم بالام؛

             بؤیویه سن آرزی قالام.»

آمما نه دن آغلاییرسان؟!

نه اوْلار ائی اینسانلار؛

                 بیر رحمه گلین

                    آخی منیم پۇلوم یوخ

                                    ایشیم یوخ

                                            یوْخسول بیریسییم.

هئچ ائولنمه دیم کی؛
      تک توْپانجا گزدیم همیشه؛

                  سئودالارین ان بؤیویون یاشایاراق.

آخی منیم اریم یوْخ...

                      یوْخ...

                        یوْخ...

                          یوْخ...

آج می قالاجاق کؤرپه م؟

اؤز اۆره یینی می یئیه جک؟

                  دؤشوم یوْخ کی...

                         سۆدوم یوْخ کی...

نوْلار اینسانلار؛

    کؤرپه می سیزلر بسله یین.

اح؛

 کیمه دئییرم،

    سیزین کی

          قوْرخولو فیلیملرینیزدن

                           دۆشونجه نیز

                                 داحا دا قوْرخولو.

ائله بیل بتر کئفلنمیشم.

                       اوْلمایا من

                           باکیره بیر قیزام!

                                          نه یم؟

یوْوْ...من

   نئچه آروادلی

    بۇرما بیییغلی بیر به یم.

زوْنقولداییرسان...

  زوْنقولداییزسان...

     آغرییان دیشیم دئییلسن کی بالام

                                    چکیب آتام سنی.

نه اوْلدوسا دا؛
          اوْلسون

                 یئتر

                    آغلاما بالام...

                                آغلاما...

                                    اۆره ییمی داغلاما بالام...

                                                              داغلاما.

شئعیر:خسرو صلح کننده«باریشان»

سئودا دئدییین...

سئودا دئدییین؛

       زامان کیمیدیر!

گؤرولمزدیر؛

  زامان ایچینده آن کیمیدیر!

بیر اوْلای کیمیدیر،

              بیلینمزدیر!

بۇنلاری دئیرکن؛

     سانمایین کی عؤمور کیمیدیر.

باخدیغین گؤی بئله؛

              داوان کیمیدیر!

گئتدییین یوْل قالخار آیاغا؛

                     دۇوار کیمیدیر!

دۆنیا سنه دار کیمیدیر!

حپیس سئللۇلوندا

    گؤرولمه ییب، بیلینمزدن،

        چیخان گۆر حای کیمیدیر،

              همیشه مبداءینه قاییدار،

                 کیمسه ائشیتمز کی اوْنو؛
                     دؤرت دۇوارداکیندان باشقا!

سئودا دئدییین؛

   اوْلای ایچینده اؤلوم کیمیدیر،

                          چاتدی ایسه؛

                             قاییتماق یوْخ..!

شئعر:خسرو صلح کننده(باریشان)

آه اوْرمانی...

 

شنآی»یما تقدیم: 

بیر یاپراغین دۆشمه سی دیر گ‍‍ؤزلرین

                                             آه اوْرمانیندا.

سئوگیلیم آه...سئوگیلیم؛

                           بۇ آیریلیغین

                                 یانغینی دیر.

بلکه بیر اۇشاق؛

     یئتیشکینلیک آرزیسییلا،

                               ماراغیندان؛

                                     چاخمیش قیویلجیمینی!

بلکه ده بیر یئتیشکین؛

                             بیر آن

                                 اۇشاقسی بیر هوسله

                                                          یوْرغونلوقدان

                                                                 تۇتوشدورموش اَلوْوونو!

سسین تیلفۇندا تیتره ییب، کدرلی تۆترکن

                                        دوْغولور یئنه ده اوْ آدام!

حسرتلنیرم؛

بیر سیقار آلیشدیریر اوْ!

آغلاییرام.

بیلینمه ییر نه دیر؟!

بیلنمه ییرم!

نه یم؟

  نه دن

     بیلمه ییرم!؟

سؤندورنمه ییر یاغان یاغیش دا

                                          بۇ یانغینی!

هئچ بیر خبر وئریلیشی؛

                 یایینلاماییر کی گؤره سن!

حارداسان «شنآی»یم؟

                     آه حارداسان؟

⎕⎕⎕

اَ...اَح

   بۇ شئعیرلرده

         سؤندورمک کیمی دیر؛

                               سۇسوزلوغو،
                                       شوْر سۇ ایله!!! 

شئعر:خسرو صلح کننده(باریشان)

14/2/1386

ایصفهان:سربازلیق

ایلان سئوگیلیم

سن بیر ایلانسان می؟

         بیلمم کی نه سن!

گؤزووه باخینجا بۆیوله نیرم!

قوْشماغا شئعریمی یارانیر سۇکوت!

گئجه نین دیبینه بیردن ائنیرم!

سن بیر ایلانسان می؟

         بیلمم کی نه سن!

⎕⎕⎕

سنی حپ دۆشوندوم،
                یاشایانمادیم!

جاوابسیز سوْرومسان سن بۇ حیاتدان.

سن بیر ایلانسان می؟

         بیلمم کی نه سن!

بلکه ده بیر قیزسان؛

منی حپ سئون...

بلکه ده بیر قیزسان؛

منله سئویشن...

بلکه ده بیر قیزسان؛

بوْیلو قالمیشیق...

بلکه ده بیر قیزسان؛

 سن منی دوْغان...

بلکه ده بیر قیزسان؛

منی بؤیودن...

بلکه ده بیر قیزسان؛

منله بؤیوین...

بلکه ده بیر قیزسان؛

من؛ سنم دئین...

بلکه ده بیر قیزسان؛

منی اؤلدورن...

اؤلدورنده منی

منی بؤلدورن...

سن بیر ایلانسان می؟

         اوْلان(1) سن نه سن!

⎕⎕⎕

آدیندا آه...نه وار؟

سن آنلارسان می؟!

هر زاد قارشیدییلا

           کیملیک قازانیر.

آدیندا آه...نه وار؟

سؤیله یرسن می؟

قزئتلرده اوْنو عئینی یازانمیر!

آدیندا آه...نه وار؟

بیر دادارسان می؟

بلکه بۇ دۆنیادا

      دادانمادیغیم؛

        نه سه بیرزاد واردیر سنین آدیندا.

سن بیر ایلانسان می؟

         بیلمم کی نه سن!

⎕⎕⎕

سۆموک تک قالیبدیر سؤز بوْغازیمدا

سن بیر ایلانسان می؟

         بیلمم کی نه سن!

⎕⎕⎕

حایدی سئودیجه ییم؛ چمبریوه آل؛

سیخ منی، ایچیمین فریادی جوْشسون.

اؤپ منی، زهریوی تؤک بوْغازیما؛

قالیبلار سؤکولسون ، پرده لر دۆشسون

پیرتلاسین گؤزلریم، بلکه بۇ دفعه؛

بیلینمز اؤلومون شئعرینی قوْشسون.

شئعیر: خسرو صلح کننده(باریشان)

رادار

قۇشلارلا یاریشان

حیات توْولو گئدن کؤنزلیک

چوْخدان قاندیریلمیش شَهَر مزارلیغینا ساری

قیسراق یئله سینده اۇنودولموش یئل

(آنلاملا آرامداکی گؤبک باغی کسیلدی می؟

                                        سوْروشمالییام!)

گؤزلرینده یاخالاندیغیم پۇسغو؛ رادار

گیزلَندیییم سۇلاردان سۆزن توْپراق

اییله نر، بالیق اَللی پوْست پۇللو آداملار

گؤرمه دیمییدی، قلبینده کی تیرافیک پوْلیسی

جزاما سۇچ قوْندورونجایا قَدَر

حیات قۇشلار کیمی قاییتماز

                               کؤچونجه

شئعیر: آ.اۇغور اوْلغار

اۇیغونلاشدیران: خوْسروْو باریشان

قاراگیله...

قاپ- قارادیر،

آنجاق؛

 قارا گۆنوم ده

       سئومه لی اوْلوب!

آخی..، بۇ دا؛

گؤزلریوی خاطیرلادیر

                  تبریزیمین قاراگیله سی.

شئعیر:خسرو صلح کننده«باریشان»

حانسی؟!

 حانسی کؤر؛

        منیم کیمی،

             گؤردوکلرییله

                  گؤژلرین اویدو؟!

حانسی کار؛

         منیم کیمی،

             ائشیتدیکلرین

                    میخلادی قولاغینا؟!

حانسی معتاد؛

           منیم کیمی،

                  چکدییی نفسله

                         جییرین سؤکدو؟!

حانسی انگل؛

           منیم کیمی،

              سوموردو بارماقلاریندان

                                      اؤز قانین؟!

حانسی یئر کوره سی؛

                     منیم کیمی

                          اولمادان بللی یئری

                                              گرکسیز،

                                                          زوراکی

                                                                 بیر جذبه یله یاشادی؟!

حانسی اوغلان؛

        منیم کیمی،
           بیر قیزا باخیرکن

                      ایضطیرابدان

                            سیندیریب زامانی

                                            آجیغیندان

                                                   اؤزون بوشادی؟!

حانسی  روبوت؛

            منیم کیمی،

                       عصبلرین

                          ائلئکتیریک پیریزینه تاخیب،

                                                  بئیینینی پاتلاتدی؟!

حانسی هئیکل؛

           منیم کیمی،

               اؤز باغرینی چاتلاتدی؟!

حانسی داش؛

          منیم کیمی،

               گؤزیاشلارییله یوغرولدو؟!

حانسی یالان؛

              منیم کیمی،

                      اؤز وارلیق ایله

                                 دوغرولدو؟!

حانسی یام- یام؛

             منیم کیمی،

                    اتین قانینا

                         تیلته ائتدی؟!

و حانسی شاعیر؛

              منیم کیمی،

                     سؤزلرین قوسدو؟!

شئعیر: خسرو صلح کننده(باریشان)

جومعه:28/2/1386

ایصفهان(شهر اوتوبوسوندا«خط واحد»)، سربازلیق.